Lekehytte i stova

I rommet under trappa opp til 2.etasje er det eit lite rom. Heilt perfekt i storleik til oppbevaring av leiker og eit par små ungar. Og heilt genialt når ein skal rydde opp etter ungane er i seng på kvelden. Denne veka har Alma vore heime frå barnehagen. Ho er forkjøla og leik ute i regnet er uheldig. Iallefall når det er haustferie neste veke. Eg har berre gitt opp å få gjort noko av det eg hadde plan om (sy blant anna). Dagane går i staden til vaffelsteiking, smårydding her og der, og kos.
I dag har me sortert i alle leiker. Ein kasse til Duplo, ein til Little People og ein til utkledningsklær. Ein pose står klar til Fretex, og Kindereggdilldallet havna i restavfallet.
♥
Postkassen frå Bruka vart opprinneleg innkjøpt for å henge på ei framtidig leikehytte i hagen. Sidan leikehytta berre er på planleggingsstadiet, så heng postkassen på stovehytta i staden. Saman med eit Welcome Friends skilt frå Riviera Maison (julegave til mor sjølv ;))

Dukkevogna snuppemor fekk til jul er i bruk kvar dag. Utruleg skjønn og fin og i god kvalitet. Den er frå SEBRA.

♥

Inni sjølve leikehytta er det ikkje sånn superkoseleg akkurat. Eg skal få sydd til ei madrass som dekker heile gulvet, og få hengt opp ei lyslenke over dei to hyllene på veggen der inne. Kom gjerne med tips til dekorering om du har nokon :)

Det er ikkje til å stikke under ein stol at det vert vanvittig mange leiker med tre ungar i hus. Me har ikkje akkurat verdas største hus heller. Så det gjeld å sortere ut, finne lure oppbevaringsløysingar og vere flink å rydde, slik at det ikkje renn over.

♥

Eg fekk eit genialt tips av mora til ei god venninne ein gong. Å gøyme litt av leikene til ungane. Ikkje ha alt framme på ein gong, men byte på det. Ungane gløymer lett kva dei har, og når ein finn fram det vekkgøymde er det som om dei får nye leiker. Dette har me praktisert, og det er heilt topp. Little People tinga er derfor på ferie i kjellaren frå nå av ;)

Medan eg skriv dette innlegget høyrer eg at det føregår hektisk leik inni og utfor skapet bak meg. Det spørs om ikkje sorteringa må gjentakast i kveld. Pytt pytt :)

Ha ein flott onsdag ♥
PS! Tusen takk for alle kommentarar på tøffelinnlegget. Eg bestilte mine tøfler herifrå.