Lindas haust

Foto: Botox - 20 %

Som hjå dei fleste foreldre går unganes ve og vel før absolutt alt anna her i huset. Det er ikkje til å stikke under ein stol at med tre ungar under sju år så vert eigenpleie og eigen helse nedprioritert de luxe.

Når det gjeld innkjøp av klær og sko så stiller dei først i køen. Dette fordi dei treng det, og ikkje minst fordi det er vanvittig enkelt å kjøpe eit plagg i den og den størrelsen, og så sit plagget som eit skudd uansett.

Mine eigne klær har sett sine beste dagar. Favorittplagga er blitt falma og nuppete. Ikkje er det så enkelt å handle klær til seg sjølv heller. Eg kan ikkje berre raske med meg eit antrekk frå topp til tå og så sit det som eit skudd. Takk og lov for returordninga på H & M. Kleskjøp føregår nemleg oftast på denne måten: Eg susar innom butikken med tre små skjønnasar og ein stor skjønning på slep ein laurdag formiddag. Eg røsker med meg 1-4 plagg på veg bort til kassen. Betaler og går fort ut igjen. Plagga prøver eg heime i eit ledig sekund. Passar dei er det topp. Passar dei ikkje vert dei returnert ein av dei næraste dagane, og pengene trygt plassert tilbake i lommeboka.

Ungane får sunn og god frukost servert, rik på vitaminer og mineraler. Eg sjølv trøkker i meg skorpene frå ungane sine brødskiver og nippar til litt lunka te som eg ikkje rakk drikke medan den framleis var varm. Medan ungane er reine og fine og iført nyvaska klede, med hårfrisyrar som er styla ved hjelp av høvesvis hårvoks og klemmer/hårstrikkar, er tilstanden annleis hjå mora. Sminken i ansiktet er oftast påført dagen i forveien, berre friska opp ved hjelp av å fjerne alt det svarte under augene ved hjelp av ein vaskeklut. Berre leppestiften er dagens.

Når me så til slutt sit klare i Peugeot'en (307 SW forøvrig) og skal legge i veg til skule og barnehage, så er eg framleis barbeint i skorne iført mine falma klær. Leppestift ja, den tar eg først på meg når me sit i bilen.

Når dei to eldste er levert (eldstemann går til skulen dei fleste dagar altså), og eg og mikrofeen er vel heime i huset igjen så kallar husarbeidet på meg. Rydde opp etter frukosten, henge opp klær til tørk (har ikkje tørketrommel), støvsuge eller noko slikt. Etterpå vaknar som oftast mikrofeen og eg ammer og koser med han.

Når han søv igjen hoppar eg i dusjen. Med øyrene på stilk, og så rask dusj som mogleg. Veit jo aldri når han vaknar igjen. Er eg heldig rekk eg sminke meg, og kanskje rekk eg til og med å fikse håret mitt med glattetang. Kanskje rekk eg også leite fram nokre klær som ikkje er fullt så falma lengre.

Kastar eg eit ekstra blikk i spegelen, så ser eg at alle nettene med lite søvn, inntak av for lite reint vatn, og alderen er i ferd med å setje sine spor. Rynkene rundt augene er det ikkje så nøye med, fordi dei latar eg at kjem av all latteren og smilinga. Men den bekymringsfura mellom øyenbrynene likar eg ikkje. Heller ikkje rynkene rundt munnen er så velkomne. Og ser ikkje huden litt gusten, grå og lite spenstig ut?

Foto: Prøvetime Madonna O2 kr 695,-

Etter denne lange og kanskje langtekkelege introen kjem eg så til poenget: Planane for hausten er å ta betre vare på Linda. Det er nemleg det eg er minst flink til. Å passe på meg sjølv, at eg har helsa i orden og ein kropp som fungerer.

Eg har kasta lange blikk etter to reklameplakatar utanfor den næraste hudpleiesalongen: - 20% på Botox, og prøvetime på Madonna O2-behandling til "berre" 695 kr. Kanskje dette er løysinga på mine første aldringsteikn. Kva ein slik O2-time kostar til vanleg anar eg ikkje. Ei heller kor mange timar ein treng for å sjå 15 år yngre ut. For å sjå ut som ein sunn 20-åring igjen. Ein ting er sikkert, eg skal ikkje ta Botox. Truleg ei heller O2-behandling. Men først og fremst skal eg gjere dette denne hausten:

-pynte meg kvar dag (bruke smykkene mine, fletter i håret osv)

-ikkje ete godteri (Har inngått veddemål med Herr Fe på dette punktet)

-drikke meir vatn

-drikke mindre Pepsi Max

-vaske sminken bort kvar kveld

-skal gå rundt Store Stokkavann (8.2 km) minst to gonger i veka

-ta fotbad

-høyre på MP3 på radioen og danse med Herr Fe og ungane så ofte me kjem på det. Nokre av mine lukkelegaste stunder er når me gjer dette.

-byrje bruke body lotion igjen

-bruke meir skjørt og kjolar

-Så sant det er opphaldsver skal eg gå til barnehagen og hente Alma, og så tar me følge med 2.klassingen heim frå skulen.

-vurdere å leige meg vaskehjelp for helgevask annakvar helg. "Alle" venninnene mine har det, og eg vurderer det sterkt.

-bruke neglelakk

-stramme inn på tid brukt til innkjøp av matvarer, og gjenopprette ein-gong-i-vekas-storhandel-opplegget me hadde før.

-kjøpe meg eit nytt plagg i ny og ne

-kose meg maksimalt

-fortsetje å vere ei så god mor som mogleg for dei tre småfeane

Det viktigaste av alt er at desse planane ikkje skal gå ut over ungane eller nokon andre. Ikkje skal eg verte ei egoistisk bimbo-dame heller. Eg skal ta vare på meg sjølv nettopp for ungane og Herr Fe si skuld. Slik at eg lever lenge, og held meg sunn og frisk og glad.

I tråd med denne planen for hausten, stod eg ørtidleg opp i dag. Dusja og sminka meg. Ja til og med håret rakk eg fikse. Så sat eg ned og åt frukost og drakk teen medan den framleis var varm. Frukost saman med ungane. Dog framleis iført falma klede, og ikkje skjørt. Rom vart ikkje bygd på ein dag heller. Huset vart reingjort, klær bretta saman og lagt på plass. Og jammen santen så dansa me attåt musikken frå MP3 på radioen i ettermiddag.

Dette er ein god plan kjenner eg. Lindas haust skal bli tidenes haust :)

Fleire som vert med å ta vare på seg sjølv?