Godt med alt som er gjort

Eg gjentar meg sjølv veldig når eg seier at det er så tilfredsstillande å få laga noko som ein lenge har tenkt at eg skulle ha gjort. Som for eksempel gåvelappar til julegavene. Dei kan jo lagast allereie nå, så slepp ein stresse med det når alt anna er så hektisk sånn like oppunder jul. Så gjeld det berre å hugse kor ein legg navnelappane slik at ein finn dei når ein skal bruke dei.  At ikkje dei vert plassert ein stad som er så lur at ein ikkje finn dei igjen, he he.

Eg draumer om ein rein og ryddig heim der alt er på stell. Der ein kan dekke bordet utan at ein først har rydda ein halvtime. Der sko står sirleg plassert på plassen sin, der alle skapdører er lukka igjen og der ingenting heng og sleng. Men det går ikkje an i praksis har eg kome fram til, og meir eller mindre gjeve opp. Slik såg spisebordet vårt ut i ettermiddag. Kaotisk.  

Det frydar meg å sjå at veslemor elskar Playmobil like mykje som eg gjorde. Desse figurane leika eg med som liten, og det er utruleg artig å sjå det i bruk igjen :)

Tusen takk for overveldande respons på gårsdagens innlegg. Det er ikkje vanskeleg i det heile tatt, berre klipp tynt nok hol i plastposen så kan du lage så snirklete figurar som berre det. Lukka til :)

Ha ei god natt og ein fin tirsdag!

Hjerter på boks

Me tjuvstarta julebaksten i helga. VELDIG tidleg ute, men pepperkakebaking er så kjekt for ungane at det er ingen vits å vente.

Pepperkakedeig har eg laga ein gong for mange. Aldri meir. Ingen vits å stresse med slikt når kjøpedeigen er så god. Denne gongen vart det Ikea sin. Hurra for eit enkelt liv ;)

 Alle kjevlene og alle kakeformene vart testa ut, og praten gjekk ivrig rundt bordet. To boksar med deig vart omforma til velduftande pepperkaker i løpet av kort tid.  

Mmmmm, det lukta jul i huset.

 

I dag har me pynta kakene. Etter at eg kjøpte boka KNAS - som forøvrig er ei super pepperkakebok- har eg utelukkande laga melisglasuren etter oppskrifta inni den. Den gjev supert resultat uansett.

Eg heiv meg på kakebaksten eg også, og laga to store hjerter som me skal henge i vinduet etterkvart. Hjertene vart dekorert med typiske droddling-snirkel-figurar og litt prikkar hist og her.

Når glasuren er tørr på denne sida, skal eg dekorere den på andre sida også. Det geniale med glasuren er at restane er holdbare i dagesvis i kjøleskapet. 

Det vert garantert fleire pepperkakebaksteøkter til før jul. Ungane har nemleg knaska pepperkaker seint og tidleg og det minkar allereie i boksane deira, he he.

Håpar alle har hatt ein fin søndag.

God klem herifrå!

Eit sørgjeleg syn

I sommar brukte me masse tid og pengar på å fikse bakhagen. Me leigde ein snekkar til å byggje ein stor platting/terasse og ei herleg trapp ned frå altandøra. Me bygde leikehus til småttisane, og me dyrka i plantekassar. Hagen var så langt i frå perfekt som den kunne komme, men den var koseleg. Mykje gjenstod før alt var slik me ville ha det, men likevel... All innsats til inga nytte. 

I dag ser hagen heilt tragisk ut. Me fjernar alt me kan ta vare på, slik at gravemaskinane og lastebilane kan ta seg til rette. Ei einsleg lita rødstrupe som har budd i hagen vår kvar vinter, ser like trist ut som meg.

 Eg fekk aldri tatt skikkelege bilder av plattingen og trappa, de kan berre så vidt skimte litt av den på bildet over. Nå ser det nemleg slik ut utfor altandøra:

Slangen som går inn gjennom ventilen er vår midlertidige vanntilførsel frå ein nabo sin utekrane. Alle hellene og lecablokkene støtta opp under plattingen. Gravemaskinane nærmar seg faretruande, og det gjer rekninga for gildet også. Siste ord er ikkje sagt i saken, men det ser ut til at alt må dekkast av oss sju partar som er beramma av lekkasjen. Og prislappen er anslått til å nærme seg millionen...Fortvilandes og frustrerandes.

Me kan velgje kva dekke me vil ha her bak etter at røyrutskiftinga er ferdig. Tidlegare har me måtta bære plenklypparen gjennom huset for kvar gong me skal slå graset her bak. Me vurderer derfor nå  å legge singel. Og plante i store krukker og kar. I tillegg til at plattingen og den fine trappa kjem opp igjen. Leikehytta skal gravemaskinføraren prøve flytte til hagen på framsida. Kanskje stikk eg heim frå jobb og knipsar bilder når den er i svevet ein dag ;)

Dei fleste er vel ferdige med å tenke hage for dette året, men har du gode forslag/synspunkt vert eg hoppandes glad :)

Ha ei fortsatt fin helg!

Vinnaren er kåra

Den heldige vinnaren av gavekortet frå Sam og Sofie vart søte Marten med bloggen Strikktakk.

Eg gjorde det enkelt og brukte Random.org til denne trekninga, og fekk altså opp nummeret 22, då eg spurte etter eit tilfeldig tall mellom 1 og 118. Marten skreiv kommentar 22 og her er det ho skreiv:

Her var det utrolig mye fint å velge mellom! Det hadde kanskje blitt en lilla fløyelstopp fra Tina Wodstrup til lille snuppa :D

Ellers syns eg faktisk at det var veldig trist at gleda over å skulle arrangere ein give away skulle bli oppfatta som om eg støttar grusom pelsoppdrett. Kjære Trine (som har lagt igjen heile fire kommentarar over kor skuffa ho er over meg) du får sende meg ein e-post dersom du har meir på hjerta. Dette var ikkje meint som noko reklameinnlegg, eller som ein kampanje for JA TIL PELS. Men ein give away fordi eg hadde lyst til å gleda nokon som var så heldige å få vinne gavekort på 500 kr.

God helg!

Jaggu snart helg igjen

Når ein er sliten og så trøytt at ein føler ein stuper, så er det ingenting som er kjekkare enn å få pakke i posten (utanom ein god klem frå dei eg elskar over alt på jord). Eg og Kristin R har vore nettvenner i mange år, og då ho kom over nokre fantastiske retro tapetrestar lurte ho på om eg var intressert i dei. Sjølvsagt var eg det. Jippi! Tapetane tenkte eg å vise fram så snart eg har fått brukt dei til eit planlagt prosjekt. Men det eg skal vise i dag, er den store overraskelsen i pakken. Sjekk dette FANTASTISKE stoffet eg fekk då. Holdt nesten på å besvime, he he. Det kan liksom ikkje bli meir meg:

Gubbevaremegvel kor glad eg vart. Tusen takk Kristin - du er toppen :)

Herr Fe er flittig i snekkarboden, og kjem stadig med nye figurar han har laga. Flinkingen :) Ekstra kjekt når me har masse fint papir frå Rie Elise Larsen å dekorere dei med. Eg veit eg lovde å oppdatere EPLA-butikken, men har ikkje rukke det enno. Ventar til litt meir er ferdig før eg gjer det. Ok?

Me har mange prosjekt i sving om dagen, og enkelte ganske mykje kjipare enn andre. De hugsar at me mista vatnet for snart fem veker sidan? Det viste seg at dette skuldast ein lekkasje/brudd på vannrøyra nedanfor oss. Truleg som eit resultat av at dei dårlege røyra ikkje tolte at brannvesenet tok alt trykket då dei sløkte ein brann i naolaget.

Nå har røyrleggarane anbefalt oss (me og seks andre rekkehus attmed oss) å skifte vannrøyr og samtidig skifte kloakkrøyra. Det er så dårleg tilstand på vannrøyret at det lekker som ein sil... Dette innebærer at heile bakhagane våre vert gravd opp. Terassen og den finfine trappa me fekk bygd i sommar vart fjerna i går(buhu), leikehytta til Alma må flyttast til hagen på andre sida av huset, og alt vert omgjort til ein graveplass utan like.

Men her gjeld det å fokusere på det positive. Etterpå vert alt nytt, vanntrykket truleg betre enn nokon gong, og me slepp bekymre oss meir for røyr og oppgraving av bakhagen. Ikkje i vår levetid iallefall ;)

Ha ein flott torsdag!

Jammen på tide...

Det er ikkje ofte eg arrangerer Give-away'ar her på bloggen. Men det er ikkje fordi eg ikkje har tilbud om det, men meir fordi eg er litt kritisk til kva eg reklamerer for. Eg må jo gå god for tinga sjølv, og det er gjer eg ikkje alltid.

Eg elskar barneklær, og det er aldri så kjekt å handle klær som når eg handlar til dei søte små. Dei kler det meste, og det er berre å velgje riktig størrelse så er det full klaff. Slik er det ikkje når eg skal handle til meg sjølv for å sei det slik, he he.

Eg er ganske ekstatisk over give-awayen eg skal presentere i dag. Premien er nemleg eit gavekort på 500 kr frå den herlege nettbutikken Sam & Sofie.

For å delta gjer du som følger:

Meld deg inn i Facebookgruppa til butikken ved å trykke på LIKER-knappen når du er der inne.

Så legg du igjen ein kommentar under dette innlegget der du skriv kva du kunne tenke deg å bruke gåvekortet på i butikken.

Eg personleg hadde definitivt spytta inn litt meir pengar og kjøpt ein av dei råkule skinnehuene frå Petit Nord. Sukk :

Lukka til i konkurransen, eg trekker den heldige vinnaren på fredag. Så vert det ei ekstra kjekk helg for den som vinn.

Ha ein flott onsdag.

Klem frå Linda

Nytelse...

Bildene talar for seg sjølv.

Nå vert det strikking i sofakroken.

Håpar du også kosar deg inne i varmen.

Klem til dei som vil :)

Tudeluuu...

Løp og kjøp

I dag har eg lyst til å komme med eit tips til herleg produkt som du kan skaffe deg lett som berre det. DillDallNina syr dei mest fantastiske ting av ypperste saumkvalitet. Eg har derfor tjuvlånt desse bildene frå Budeiebutikken hennar, berre sånn i tilfelle det er nokon som er innom her hos meg, som ikkje veit om denne vesle skatten av ein bloggbutikk.

 Fargekombinasjonane i dei sydde tekstilane er dødsfine, eg kan berre sitje og glo og glo på for eksempel kombinasjonane i teppet under.

Julestrømpene er ultratøffe, ja rett og slett heilt herlege.

At DillDallNina verkar som verdas koselegaste jente gjer jo berre Budeiebutikken enno meir spesiell. Beklagar at bildekvaliteten er så som så, men slik er det når ein tjuvlåner bilder og ikkje spør om lov. Uffa meg, eg er litt frampå her nå. Men så gjekk det så bra då eg tjuvlånte bildene til Sew Your Own innlegget - fekk jo takkemail og greier og greier. Så nå kjører eg på og reklamerer litt for ultraflinke bloggevenner ;)

Ha ei flott veke!

Jula kom tidleg til Åsen

Herr Fe har laga tapetserte JUL-bokstavar, og eg har dratt fram julepynten for å style litt rundt bokstavane. Bokstavane er tapetsert med nyinnkjøpt papir frå Rie Elise Larsen og eg syns dei vart fantastisk fine.

 Julekuleugla har tatt plass oppi ei skjønne soppepotte eg fekk hjå Drømmen om en eplehage i fjor. Kjekt gjensyn :)

Dei gamle soppelysestakane mine elskar eg. Artig at Rice har kome med ein kopi av desse i år.

Herr Fe har også laga "vanlege" JUL-bokstavar slik han har gjort dei siste åra. Tippar bokstavane (både av den tapetserte og den malte sorten) havnar på EPLA i løpet av dagen/kvelden. Du kan jo også sende ein mail til mi adresse (linda.saebo@lyse.net) dersom du vil bestille bokstavar.

Julepynten er nå pakka bort, og kjem først fram at til advent. He  he, greit nok at butikkane allereie bugnar over av julepynt og julekaker. Her heime ventar me med slikt til desember heldigvis :)
Nå skal me ut i sola.

Ha ein flott søndag du også :)

Dette må då vere eit kupp?

Torsdag kveld var eg og leverte ein sekk med for små barneklær i Fretex-containeren på Mariero. Medan eg stod og pressa sekken inn i innsamlingsboksen, så oppdaga eg ein knallfin stol inni butikken.

Hmmmm.

Den hadde jo berre passa perfekt heima hjå oss.

Charles & Eames gyngestolen er nemleg på eit lite kjellaropphald inntil Simon har blitt litt større og ikkje fullt så villbajas lengre...

Butikken var sjølvsagt stengt torsdag kveld, men i går, etter jobb, svippa eg innom for å ta stolen meir nøye i augesyn. Ja, sånn i tilfelle den framleis var der.

Jommen santen var den der, og prisen var jo latterleg billig. 150 kr for denne knallfine og knallgode stolen.

Ikkje lealaus og ikkje skakk, og fin i lakken. Nei, eg var ikkje sein med å betale for den og plassere den trygt inni Peugeoten. 

Puh.

Nok ein skatt i hus ;)

 Så i dag har eg knipsa bilder i vilden sky av herligheten. Er den ikkje fin? Eg fantaserer jo om at dette er ein ekte designerstol, men ser ingen merking av noko slag. Uansett er iallefall kvaliteten heilt topp, og eg undrast på om treverket er bjørk. Den er veldig lett i vekt.

Stolen er breid og god, og super for to kranglefantar som kviler ut med kvar sin is innimellom alle påfunna sine (ansikta var så skitne at dei måtte sensurerast ;) ). Designerstol eller ei - ein perfekt stol for oss her i huset med andre ord.

Ha ei herleg helg, klem frå Linda.

Sew your own

For eit par-tre år sidan kom eg over Sew Your Own-heimesida. Ein nettbutikk der ein kan kjøpe mønster-kit på desse herlege små vesenene eg har tjuvlånt bilder av (eg har sendt ein e-post og spurt om godkjenning, men hadde ikkje tid til å vente på svar).  I dag er dagen for å tipse dåko andre om sida, stikk innom og bli inspirert til å sy og kjøp gjerne deg eit mønster eller to du også.

Innehavaren av Sew Your Own butikken har den herlege bloggen Three Buttons.

Velbekomme ;)

Jepp, der fekk eg oppdatert bloggen også. Nå når eg egentleg skal forberede meg på ein presentasjon eg skal halde i morgon ;) Dersom eg gløymer ut geologien i kampens hete, får eg heller fortelje dei om Miss Allsorts, Miss Buttons og Mr Electron, he he. Det gjer nok susen.

Tudeluu :)

Ut med Gilbert. Inn med Norvald.

Gilbertstolane våre byrja dra på åra.

Lealause. Malingsslitte. Tusjflekkar som ikkje kunne fjernast.

Godt brukte.

Ferdig med sin misjon i denne heimen.

Kanskje får dei seg ein ny familie etter eit mellomstopp på Fretex.

Seks nye Norvaldstolar er montert og tekne i bruk.

Reine.

Fine.

Nye.

Dårleg fotolys høyrer med til denne årstida. Det er slik det skal vere i November.

Har du lyst på dei seks godt brukte Gilbertstolar (vert gode som nye med eit malingsstrøk og ved å etterteite skruane)? I så fall må du komme her og forsyne deg før dei fyk av gårde til Fretex. Dei står ferdig stabla på terassen. Send meg ein mail om du vil ha dei :)

Ha ei flott veke :)

Oppdatering: Stolane er nå gitt bort til ein skjønn mann med ein garantert like skjønn familie. Håpar stolane kjem til nytte :)